۱۲ربیع الاول۔ عیدِ میلاد کا دن بہت ہی عظیم دن ہے کیونکہ یہ رحمۃ اللعالمین کی دنیا میں تشریف آوری یعنی ظہور کا دن ہے۔ اس دن کی ہر گھڑی دُعاوں اور قبولیت کی ہے۔ اسلئے اس دن کی عظمت کے اظہار کے لئے میلاد کا جشن منانا چاہئے۔ آپ سب جاتنے ہیں کہ دنیا کی ہر حکومت اپنے قیام کا دن مناتی ہے، ہر قوم اپنے لیڈر اور ہر اُمّت اپنے نبی پیغمبر کی پیدائش کا دن مناتی ہے۔اور سبھی مل کر لیڈر ، نبی پیغمبر کے کارناموں کو سراہتے ہیں۔ ان کے پیغامات کو یاد کرتے ہیں اور قوم کی بھلائی کے لئے غور و فکر کرتے ہیں۔اس سے انسانیت کا بھلا ہوتا ہے۔ مگر افوس کے ہماری قوم میں چند فرقے ایسے بھی موجود ہیں جو اپنے نبی سرکارِ دو عالم ﷺ کی ولادت ، یعنی ظہور کا دن منانے کو بدعت و شرک سمجھتے ہیں۔ ہم قرآنِ کریم کی روشنی میں یہ جاننے کی کوشش کریں گے کہ نبی ﷺ کا میلاد منانا درست ہے کہ نہیں ؟ اس سلسلہ میں ہم میلاد کے مخالفین کے اعتراضات ۔ مثلاً شرک، بدت، غیر شرعی عمل کس کو کہتے ہیں، سمجھ لیں گے۔

بدت: بدت اُس فعل یا کام کو کہتے ہیں جو حضور ﷺ کے پردے کے بعد دین میں شامل کیا گیاہو اور جس سے انسانیت کے نقصان کا خدشہ ہو۔ غور کرنے کی بات ہے۔ آپ سب اچھی طرح جانتے ہیں ہماری روز مرہ کی زندگی میں انگنت کام بدعات ہی ہیں۔مثلاً عالیشان گھروں میں رہنا، عمدہ ترین کپڑے پہننا ، لذیذ کھانے کھانا۔ شاندار کاروں میں گھومنا۔ زر پرستی کرنا۔ سیاسی شخصیات کا برتھ ڈے منانا۔ دعوت کا نام پر غیر ضروری پارٹیاں اُڑانا ، شادی کی سالگرہ منانا ۔ شادیوں میں بڑے پیمانے پر جہیزوں کا لین دین۔ وغیرہ،وغیرہ۔ یہ سب کام کیا سنت کے مطابق ہیں؟ نہیں نا۔ تو پھر یہ سب بھی تو بدعات ہی ہیں۔ غرض ہمہ تن یعنی سر سے لے کر پاوں تک بدعات میں پڑے ہونے کے باوجود مخالفین میلاد کو اپنی بدعات نظر نہیں آتیں۔البتہ لوگوں کو میلاد النبی ﷺ منانے میں بدعت نظر آتا ہے۔ بقول ۔ اپنی آنکھ کا شہتیر نظر نہیں آتا۔ دوسرے کی آنکھ کا تنکا دیکھ لیتے ہیں۔ عیدِمیلاد النبی کے جشن و جلوس میں قوم کی بھلائی ہے۔ناواقف اور لا علم عوام اپنے بڑے بزرگوں اور اسلام کی تاریخ سے واقف ہو جاتے ہیں۔حضور ﷺ کے اخلاص و عادات اور آپ ﷺ کے اخلاق حسنہ کی یاد تازہ ہوجاتی ہے۔ آپ ﷺ کی تعلیمات کا اعادہ ہوتا ہے۔ایسی مبارک اور مفید محفلوں کو اگر کوئی بدعت سمجھتا ہےتو بیشک یہ بدعت بھی مبارک و مباح ہے۔ اور کوئی مائی کا لال ان محفلوں کو انسانیت کے لئے با عث نقصان ثابت نہیں کر سکتا۔ مخالفینِ میلاد اور تمام مسلمین کی اطلاع کے لئے یہاں ایک حدیث عرض ہے۔ یہ حدیث ابن ابی شیبہؓ نے کتبِ احادیث احمد بن جنبلؓ ، مسلم شریف ، ترمذی ، ابن ماجہ، بیہقی شریف سے نقل کی ہے، کہ حضرت ابو ہریرہؓ اور حضرت ابو سعیدؓ دونوں اس بات کی گواہی دیتے ہیں کہ ہم نے حضورﷺ سے سنا ہےکہ’’جو جماعت اللہ کے ذکر میں مشغول ہوجاتی ہے، فرشتے اس جماعت کو سب طرف سے گھیر لیتے ہیں اور اللہ کی رحمت بھی ان کو گھیر لیتی ہے‘‘۔ معلوم ہوا کہ اللہ کا ذکر اللہ کی رحمت کے نزول کا باعث ہوتا ہے تو کیا اللہ کے حبیب ﷺکے ذکر پررحمت کا نزول نہ ہوگا؟ بیشک ہوگا! اسی لئے پہلے کے ادوار میں لوگ اپنے گھروں میں اللہ و رسولﷺ کے ذکر کی محفلوں کا انعقاد کرتے تھے۔

شرک: میلاد کے مخالفین کا دوسرا اعتراض یہ ہے کہ میلاد منانا شرک ہے۔ اور شرک کے معنی ہیں کسی مخلوق کو اللہ کے برابر سمجھنا ۔ اللہ کے ساتھ شریک کرنا۔ قرآن کریم کے سورۃ اخلاص میں اللہ خود فرماتا ہے :

لَمْ يَلِدْ وَلَمْ يُولَدْ

ترجمہ: نہ میں پیدا ہوا ہوں اور نہ کسی نے جنا ہے۔

غرض جب اللہ کا جنم ہی نہیں ہے تو پھر کوئی کس طرح اللہ کی پیدائش کا دن یا میلاد منا سکتا ہے۔ کیا کسی اہلِ حدیث یا دیوبندی نے اللہ کی میلاد منائی ہے؟ نہیں نا! تو پھر حضور ﷺ کی میلاد منانا شرک کہاں سے ہوگیا؟ ہم تو اللہ کے محبوب ﷺ کا جشن میلاد منا کر اللہ کا شکر ادا کرتے ہیں کہ، اس نے عیدِ میلاد کے دن ہمیں شافع محشر اور اس کی ذات کی معرفت عطا کرنے والا عطا کیا۔ اس میں شرک کی بات کہاں ہے۔بس جو منہ میں آیا کہہ دیا اور معصوم و لا علم عوام کو بھی شرک اور بدعت کا خوف دلا کر فیض اٹھانے اور خود ان کی اصلاح کرنے کا موقعہ پانے سے بھی محروم کر دیا۔

غیر شرعی: مخالفین میلاد کا تیسرا اعتراض یہ ہے کہ میلاد منانا غیر شرعی عمل ہے۔ لہٰذا پہلے ہم جانیں گے کہ شرعی کسے کہتے ہیں۔

اسلامی قانون کو شرع کہتے ہیں۔ اور شرع یا اسلامی قانون کو یہ طاقت حاصل ہے کہ جو کام یا فعل انسانیت کے لئے باعثِ نقصان ہو اس پر شرع پابندی عائد کرسکتا ہے۔ مثلاً چوری کرنا، زنا کرنا، قتل کرنا وغیرہ۔ ان کاموں سے انسانیت کا نقصان ہوتا ہے اس لئے ان کاموں پر شرع کی پابندی یا ممانعت ہے اور ان کاموں کو غیر شرعی یا غیر قانونی بھی کہتے ہیں۔ اس تعلق سے مزے کی بات یہ ہے کہ دنیا بھر کی کتابوں میں کہیں بھی یہ نہیں لکھا ہے کہ رسولِ اکرم ﷺ کا میلاد منانا غیر شرعی عمل ہے، اس لئے میلاد النبی نہ منایا جائے۔ اب جبکہ میلاد نہیں منانا ایسا کوئی شرعی جواز ہی نہیں ہے تو پھر مخالفین میلاد نے کیسے نافز کر دیا کہ میلاد منانا غیر شرعی ہے؟ معلوم ہوا کہ آگے دیکھا نہ پیچھے۔ بس جو بات من میں آئی کہہ دی۔ خیر! آپ نے دیکھا کہ ہم نے مخالفین میلاد کے تینوں اعتراضات کا مدلل جواب دے کر ان اعتراضات کو غلط اور باطل ثابت کردیا ہے۔ اب ہم دیکھیں گے کہ اللہ کے نزدیک آنحضورﷺ کا میلاد منانا نا جائز ہے یا عین حق و مباح! قرآن کریم کے سورۃ مریم، آیت نمبر ۱۵ میں حضرت عیسیٰؑ کی پیدائش پر اللہ تعالی فرماتا ہے:

وَسَلَـٰمٌ عَلَيْهِ يَوْمَ وُلِدَ وَيَوْمَ يَمُوتُ۔۔۔

ترجمہ: اور سلامتی ہے اُن پر جس دن وہ پیدا ہوئےاور جس دن پردہ ہوئے۔۔۔

قرآن کریم کی اس آیت سے ثابت ہوتا ہے کہ جس دن نبی پیدا ہوتے ہیں اس دن پر اللہ کا سلام آتا ہے، الہٰذا نبی کی پیدائش کا دن اللہ کے نزدیک بڑی عظمت و برکت والا ہے، یہ تزکرہ تو حضرت عیسیٰؑ مسیح اللہ کا ہے، جبکہ ہمارے پیارے نبی سردارِ الانبیا، امام المرسلین، تاجدارِ کونین، سرکارِ دو عالم ﷺ ہیں، تو آپ کی ولادت کے دن کی عظمت و فضیلت کا کیا ذکر ہو! قرآن کی سورۃ الانبیا، آیت نمبر 107 میں اللہ خود فرماتا ہے:

وَمَآ أَرْسَلْنَـٰكَ إِلَّا رَحْمَةًۭ لِّلْعَـٰلَمِينَ

ترجمہ: اور ہم نے آپ ﷺ کو تمام عالموں کے لئے رحمت بنا کر بھیجا ہے۔

قرآن کریم میں سورۃ النسا، آیت نمبر 113 میں اللہ فرماتا ہے:

’’وَكَانَ فَضْلُ ٱللَّهِ عَلَيْكَ عَظِيمًۭا ‘‘

ترجمہ: آپ ﷺ پر اللہ کا عظیم فضل ہے۔

قرآن کریم میں سورۃ الاسرا ، آیت نمبر 87 میں اللہ فرماتا ہے:

’’إِنَّ فَضْلَهُۥ كَانَ عَلَيْكَ كَبِيرًۭا ‘‘

ترجمہ: آپ ﷺ پر اللہ کا بڑا فضل ہے۔

مقامِ غور ہیں وہ ہستی! جن پر اللہ کا بڑا عظیم فضل ہے، جو تمام عالموں کے لئے رحمت ہیں، ایسی ہستی کا دنیا میں ظہور، انسانیت پر اللہ کا فضل و احسان ہی ہے! بیشک بہت بڑا احسان و کرم ہے، اور اسی لئے قرآن کریم میں سورۃ یونس، آیت نمبر 58 میں کہتا ہے:

قُلْ بِفَضْلِ ٱللَّهِ وَبِرَحْمَتِهِٖ فَبِذَٰلِكَ فَلْيَفْرَحُوا۟ هُوَ خَيْرٌۭ مِّمَّا يَجْمَعُونَ

ترجمہ: میرے حبیب آپ فرما دیجئےکہ، جب اﷲ کا فضل ورحمت ملے تو خوشیاں مناو

لہذٰا تمام مومنین کو احکامِ الٰہی کے مطابق اس دن ضرور جشن و خوشیاں منانی چاہئے۔ اس میں کوئی قیل وقال نہیں! گھروں، کارخانوں، دفتروں، مدرسوں، مساجد، ہر جا چراغاں کرنا چاہئے۔ حضورﷺکے اسوہ کو عام کرنے کے لئے، جگہ جگہ تقریری جلسوں کا انعقادہونا چاہئے۔ اس سلسلے میں بچوّں کی ہمت و حوصلہ افزائی کے لئے انعامات و مٹھائیاں تقسیم ہونی چاہئے۔غرض ہر طرف مرحبا صل علیٰ۔۔ یا نبی سلام علیک۔۔۔ کی صدائیں بلند ہونی چاہئے۔

اوپر کے مضمون سے یہ بات اچھی طرح واضح ہو گئی ہے کہ میلاد النبیﷺ منانے کے مخالفین، دراصل آنحضورﷺ کی ذاتِ اقدس و حقیقت سے نا واقف لوگ ہیں۔ اور یہ حضرات بس ایک اللہ کی تعریف و توقیر کے علاوہ۔۔ احکاماتِ الٰہیہ کے مطابق کوئی دوسری سچی و صحیح بات سننا یا سمجھنا ہی نہیں چاہتے ہیں۔ اس سلسلہ میں ہم آنحضورﷺ کی ذات مبارکہ روحِ انوار اور عام انسانوں کے ارواحوں میں جو بنیادی فرق ہے اس کا ذکر کرینگے۔ آ پ ﷺ نے فرمایا ہے:

اَنَا مِنْ نُورِْ اﷲ ِ وَکُلُّ ْالخَلَائِقَ مِنَ ْالنُورِ

مشکوٰۃ حقانیہ شریف ۔ صفحہ 513

ترجمہ: اللہ نے سب سے پہلے میرے نور کی تخلیق کی اور میرے نور سے تمام دنیا کو بنایا

اللہ تعالیٰ نے سب سے پہلے نورِ محمدیﷺ خلق کیا اور یہی نورِ محمدؐ سرورِ کائنات ﷺ کی ذات یعنی روحِ مبارکہ ہے۔ اسی لئے آپ ﷺ نے فرمایاہے۔

مَنْ رَآنِي فَقَدْ رَأَى الْحَقَّ

ترجمہ: جس نے مجھے دیکھا اس نے اللہ کو دیکھا۔

بخاری شریف جلد اول صفحہ - Book 91, Hadith 16 - 21

آپ ﷺ کا قول ہےکہ، جس نے مجھے دیکھا ۔ دیکھا سے مراد یہ ہے کہ ، آپؐ کی نورانی ذات یعنی، نورِمحمدؐ کو جس نور والی آنکھ نے دیکھا ، اس نے اللہ کو دیکھا۔ کیونکہ نور کو نور والی آنکھ ہی دیکھ سکتی ہے۔ بقول:

آنکھ والاتیرے جوبن کا تماشہ دیکھے دیدہ کور کو کیا آئے نظر کیا دیکھے

غرض جن صحابہ اکرام نے آپﷺ کی ذات میں اللہ کے نور، ’’نورِ محمدؐ ‘‘ کو دیکھا ان کی صلوٰۃ قائم ہوگئی کیونکہ صلوٰۃ کے معنی ہیں دیدار یا دیکھنا یا رابطہ کرنا۔ قرآن میں بھی صلوٰۃ قائم کرنے کا ہی حکم ہے۔غرض وہ صحابہ جن کو نورِ محمدﷺ کی دید میّسر آئی وہ آپ ﷺ کی چوکھٹ پر غلام بن کر بیٹھ گئے۔ اُن کے پیشوا علی مولاؑ ہیں۔ اُن ہی حضرات سے صوفیا کا سلسلہ شروع ہوا۔ اور یہیں سے طریقت کا اجرا بھی ہوااور اولیا اکرام ظاہر ہوئے۔ قصہ مختصر ! حضورﷺ کی نورانی کیفیت کا مشاہدہ پانے والےصحابہ، راہِ طریقت سے جڑ گئے۔ اور جو حضرات حضورﷺ کی نورانی کیفیت کی دید سے محروم رہے وہ آپؐ کی تعلیمات، یعنی شریعت پر عمل پیرا ہوئے۔ شریعت آدمی کو مہذّب بنا سکتی ہے اور اس سے اچھے سماج کی تشکیل تو ہوسکتی ہے مگر، شریعت بندے کو اللہ سے نہیں ملا سکتی۔اس کے لئے واہِ طریقت، اولیا کرام کا راستہ ضروری ہے۔ بڑے افسوس کا مقام ہے کہ دین اسلام کے بیشتر طبقات، روحانیت نور کو مانتے نہیں، اس لئے اس کو جاننے کی کوشش بھی نہیں کرتے۔ اسی کا یہ نتیجہ ہےکہ ہمارا حال اُس بچہ کی طرح ہے جو پھل کا مغز چھوڑ کر، چھلکے کو لئے گھومتا پھرتا ہے۔ اسلام میں مختلف تفرقات ہونے کے سبب بھی یہی خامیاں ہے۔

اس مضمون سے قارئین کو اچھی طرح یہ اندازہ ہوگیا ہوگا کہ، اسلام کی تاریخ پر ظلمت کے کئی پردے مڑے ہیں۔ خود آپ ﷺ کی اُمت کا بڑا حصہ اپنے قائد ، سردارِ حاکم یعنی آپ ﷺ کی حقیقت سے قطعی لا علم و ناواقف ہے۔ اور اسی لاعلمی کی وجہ سے آپ ﷺ کی شان میں گستاخانہ کلام کرتے ہیں۔ جبکہ خود اللہ نے قرآن کریم میں بے شمار دلیلیں آپ ﷺ کی شان و امتیاز میں پیش کی ہیں۔ مولا ہمیں اپنے محبوب سرکارِ دوعالم ﷺ کی محبت اور دین کع صحیح حقائق سمجھنے کی توفیق عطا فرمائے۔ آمین!

اختتامِ کلام پر اپنے آقا کے حضور ہم اپنی اور تمام اّمت کی طرف سے عاجزانہ التجا کرتے ہیں کہ مولا، ان مبارک و نادر گھڑیوں کے طفیل ہماری کوتاہیوں، غلطیوں، اور نادانیوں کو بخش دیں۔ اور ہمارے دلوں کو اپنی محبت کے شرر سے تابندہ فرما دیں۔ تاکہ اس میکدہ سے ہر سو یہ صدا بلند ہو!

صدا اسلام و درود کی آتی رہے گی نبی ﷺ   کا میلاد    ہوتا    رہے گا خدا     اہلِ    دل     کو      آباد      رکھے میلاد    کا    جشن    ہوتا    رہے    گا

مرحبا صلِ علیٰ۔ مرحبا صلِ علیٰ۔ یا نبی سلام علیک

تصوف کے نظریہ کو سمجھنے کے لیے اس کے بنیادی عناصر/ اصطلاحات کو سمجھنے کی ضرورت ہے۔ ان تمام عناصر اور اصطلاحات کو ایک الگ صفحہ پر سادہ سوال اور جواب کی شکل میں بیان کیا گیا ہے۔ بنیادِ تصوف کے صفحہ پر جانے کے لیے یہاں کلک کریں۔.